Kuentaso

Kuentaso ta un kompetensia di skirbi pa hende na Boneiru ku talento pa skirbi, ku ke
inspirá i motivá mucha ku nan propio storia úniko na papiamentu, kaminda e ganadó ta
haña oportunidat pa konbertí su storia den un buki pa mucha ku lo keda publiká. Ta
importante pa konta storia nobo ku nos muchanan por rekonosé nan mes den dje, i pa
nos idioma papiamentu ta keda salbaguardiá.

Kiko Kuentaso ta enserá?
Durante un trayekto intensivo di coaching di un luna, e finalistanan ta haña guia pa
elaborá, refiná i transformá nan storiá i hasié un buki pa mucha. E trayekto di coaching
no solamente ta duna sosten den e proseso di skirbimentu, pero e ta duna oportunidat
tambe pa laga skucha bo propio bos.

Kon tur kos ta bai?
– Eskritornan por entregá nan storia komo parti di e kompetensia di skirbimentu.
– For di e storianan ku drenta ta selektá e finalistanan ku ta sigui desaroyá nan storia
bou di guia di coachnan eksperensiá.
– E trayekto di coaching ta dura maksimalmente un luna, aparte di e tempu ku bo mes
ta dediká na skirbimentu.
– Na final di e trayekto ta skohe e mihó storia, ku lo keda publiká komo buki pa mucha i
entregá na nos skolnan komo regalo di Siman di Buki di Mucha den luna di òktober
2025.

Dikon partisipá?
– Haña guia profeshonal den e proseso di skirbimentu
– Chèns pa gana publikashon di bo propio buki pa mucha
– Kontribuí na promoshon di idioma papiamentu i su kultura
– Krea i laga bo bos resoná i inspirá e siguiente generashon di lesadó
Bo ta kla pa duna bida na bo propio buki pa mucha?
E ora ei lesa e instrukshonnan, pa mira kiko bo registrashon tin ku kumpli kuné.

Proseso i desaroyo di e kompetensia
21 di mart – 11 di aprel Posibilidat pa entregá storia ta habrí: Eskritornan por entregá
nan idea pa un storia.
18 di aprel – 20 di aprel: Ta anunsiá e finalistanan: Ta informá e partisipantenan
tokante ken ta e finalistanan.                                                                                                                                         Aprel – mei: Trayekto di coaching: Bou di guia e finalistanan ta traha riba nan buki pa
mucha.
18 di mei: Ta anunsiá e ganadó: Ta skohe e mihó storia i ta anunsiá e ganadó.
Despues di e anunsio ta kuminsá un periodo intensivo pa e ganadó, den kua e tin ku
traha duru pa finalisá e buki kompletamente i sòru pa e ta kla pa publikashon.

Kondishonnan i instrukshonnan
Pa partisipá na Kuentaso, bo tin ku kumpli ku e siguiente kondishonnan:
– Bo ta biba na Boneiru.
– Bo ta skirbi na papiamentu i bo ta duna balor na konservashon di e idioma akí.
– Bo ke skirbi un buki pa mucha na papiamentu, ku muchanan por rekonosé nan mes
den dje.
– Tema di e buki ta aventura i e grupo di enfoke ta mucha di 6 pa 10 aña.
– Komo finalista bo ta sigui e trayekto kompleto di coaching di maksimalmente un luna
(na rason di 3 pa 5 ora pa siman).
– Komo ganadó bo ta sòru pa bo tin tempu i bo ta dediká bo mes kompletamente na
finalisashon di bo buki.

Kon pa registrá i entregá bo storia
Manda bo storia (maksimalmente 1 storia) ku e siguiente informashon na
schrijfwedstrijd@rosestories.nl:

Informashonnan personal:
– Nòmber i fam
– Edat
– Emailadrès
– Number di telefòn

Aneksonan (kada anekso ta maksimalmente 1 página):
1. Bo idea òf storia – Un deskripshon kòrtiku di bo storia.
2. Un biografia kòrtiku di bo mes – Konta ken bo ta, kiko bo ta hasi òf tin gana di hasi.
3. Un kapítulo komo ehèmpel – Un fragmento for di bo storia.

Sòru pa bo informashonnan ta kompleto pa bo bini na remarke pa e kompetensia.
Kuentaso ta un kolaborashon entre Stichting Lezen en Schrijven Bonaire, Biblioteka
Públiko Boneiru, Letterenfonds, Akademia Papiamentu, Entidat Públiko Boneiru i Rose
Stories. Huntu nos ta komprometé nos mes pa, ku ayudo di Kuentaso, identifiká,
enkurashá i sigui desaroyá talento nobo i alabes inspirá i motivá e generashon nobo di
lesadó.

* Kuentaso ta intenshoná pa eskritor adulto, pero ta habrí tambe pa talento hóben for di
12 aña ku permiso di nan mayor(nan).